Të gjithë - Nga Edison Ypi

Të gjithë ikën me anije.

Të gjithë janë penduar.

Të gjithë e pranuan pluralizmin.

Të gjithë kanë ndërruar mendje.

Të gjithë ia falën paret një jevge.

Të gjithë besojnë se s'bënë gabim.

Të gjithë shajnë pushtetin.

Të gjithë mallkojnë opozitën.

Të gjithë çohen nga gjumi të lodhur.

Të gjithë dalin pa e ditur se ku do venë.

Të gjithë hyjnë e s'dinë ç'të bëjnë.

Të gjithë ikin nga sytë-këmbët.

Të gjithë vijnë nga veshët-dhëmbët.

Të gjithë vjedhin njëri-tjetrin.

Të gjithë vidhen prej të gjithëve.

Të gjithë duan pare.

Të gjithë thonë se paret s'kanë vlerë.

Të gjithë kanë makina.

Të gjithë nuk preferojnë të udhëtojnë.

Të gjithë mbahen për trima.

Të gjithë dhiten në brekë.

Të gjithë hanë.

Të gjithë nuk ngopen.

Të gjithë kafshojnë ç'të gjejnë.

Të gjithë kockën lëpijnë.

Të gjithë mbulohen dhe mërdhifin.

Të gjithë zbulohen dhe kanë vapë.

Të gjithë dashurohen dhe rrihen e theren.

Të gjithë urrehen dhe puthen e jargaviten.

Të gjithë e kanë nga një copë pronë.

Të gjithë ankohen prej fukarallëkut.

Të gjithë e kanë nga një shtëpi.

Të gjithë ankohen se e kanë të vogël.

Të gjithë përdorin energjinë elektrike.

Të gjithë energjinë e shpërdorojnë.

Të gjithë e urrejnë korrupsionin.

Të gjithë korruptohen në çast.

Të gjithë marrin ryshfet pa iu lëvizur qerpiku.

Të gjithë japin ryshfet pa iu dridhur dora.

Të gjithë hanë bukë, shqyejnë mish, pijnë qumësht, lëngje frutash.

Të gjithë s'duan t'ia dinë për katundin prej nga vijnë ato të mira.

Të gjithë refuzojnë të jenë katundarë me fytyrë të rreshkur dhe gunë.

Të gjithë duan të jenë qytetarë surrat-bardhë me laptop në sup.

Të gjithë thonë se janë punëtorë.

Të gjithë nuk zenë gjë me dorë sytë t’ua nxjerrësh.

Të gjithë mbahen për oratorë.

Të gjithë janë gagaçë.

Të gjithë hiqen për të ndjeshëm.

Të gjithë janë të pashpirt.

Të gjithë mbahen për të sinqertë.

Të gjithë janë rrenacakë.

Të gjithë mbahen për të mëshirshëm.

Të gjithë braktisin prindërit e moshuar, të sëmurët, fatkeqët.

Të gjithë janë të bindur se taksat duhen paguar.

Të gjithë u bishtnojnë taksave.

Të gjithë blejnë.

Të gjithë shesin.

Të gjithë që blejnë u duken çmimet e larta.

Të gjithë që shesin u duken çmimet e ulëta.

Të gjithë, kur shesin, nuk ta japin kuponin tatimor.

Të gjithë, kur blejnë, kuptonin tatimor nuk e kërkojnë.

Të gjithë nguten dhe bëjnë gabime.

Të gjithë përmbahen dhe s'bëjnë as punë, as gabime.

Të gjithë janë hesapçinj gjenialë.

Të gjithë nuk dinë sa bëjnë 1 edhe 1.

Të gjithë blejnë libra.

Të gjithë nuk lexojnë.

Të gjithë shkruajnë libra.

Të gjithë lexojnë vetëm librat e tyre.

Të gjithë mbahen për mendimtarë.

Të gjithë janë mistifikatorë.

Të gjithë fantazojnë mullinj ere.

Të gjithë imagjinojnë det me kos.

Të gjithë ëndërrojnë male me mish, fusha me bakllava.

Të gjithë vajtojnë sikur qeshin.

Të gjithë qeshin sikur qajnë.

Të gjithë nëpër dasma rrinë seriozë si në funeral.

Të gjithë në funeral ia kërrcasin muhabetit si në aheng.

Të gjithë janë në Fejsbuk.

Të gjithë në Fejsbuk janë për t’u shitur me identitet tjetër.

Të gjithë që në Fejsbuk dalin të qeshur, janë fatkeqë.

Të gjithë që në Fejsbuk dalin të menduar janë budallenj.

Të gjithë pasditeve ia marrin një sy gjumë.

Të gjithë e dinë se kafene ka shumë.

Të gjithë janë të paqartë në cilën kafene të venë.

Të gjithë ndjehen të dëshpëruar në muzg.

Të gjithë ankohen se televizori e zbukuron realitetin.

Të gjithë shohin televizor pafund.

Të gjithë gazetarët bëjnë reportazhe pa vajtur.

Të gjithë lexuesit besojnë pa e përdorur trurin.

Të gjithë janë të shëndetshëm.

Të gjithë ankohen se janë të sëmurë.

Të gjithë mjekët japin këshilla.

Të gjithë të sëmurët nuk i respektojnë këshillat.

Të gjithë politikanët gënjejnë.

Të gjithë votuesit besojnë.

Të gjithë prodhuesit mashtrojnë.

Të gjithë konsumtorët blejnë.

Të gjithë thonë se e njohin Historinë.

Të gjithë nuk dinë çfarë ka ndodhur mbi këtë truall me shekuj.

Të gjithë thonë se e njohin gjeografinë e Shqipërisë.

Të gjithë nuk e dinë ku ndodhet katundi Lëpush Breshkë.

Të gjithë pjerdhin.

Të gjithë bëjnë sikur erën nuk e ndjejnë.

Të gjithë të gjithëve ia fusin.

Të gjithë të gjithëve ia qisin.

Të gjithë presin të vdesin.

©Edison Ypi