Rubrika “Pyetësori i Jetës”: I ftuar Nador Bakalli

“Pyetësori i Jetës” është një tip interviste jo e personalizuar, as e përgatitur enkas për të ftuarin, përkundrazi kemi të bëjmë me një listë prej 31 pyetjesh të pandryshueshme që u drejtohen çdo javë personazheve të Diasporës Shqiptaro-Kanadeze të përzgjedhur nga kryeredaktorja e FlasShqip, Jeta Dedja. Pyetjet synojnë ngacmimin e emocioneve, kujtesës, dhe sigurisht mendimeve të të ftuarit në lidhje me tema në dukje të vogla, por me ndikim të konsiderueshëm në jetën dhe sjelljen e njeriut.

Ja provojeni edhe ju ndërkohë që lexoni përgjigjet e të ftuarit të sotëm, Nador Bakalli, me banim në Toronto (edhe në Tiranë, kur mundet 😊). Ekonomist me profesion, ai punon prej vitesh si analist në sistemin e patentave në Provincën e Ontarios. Prej disa kohësh Nadori është shumë aktiv edhe si përfaqësues në Kanada i “Diaspora për Shqipërinë e Lirë”, lëvizje që u krijua vitin e kaluar nga një grup profesionistësh të rinj në emigracion.

1. Nador nëse emocionet kanë ngjyrë, çfarë ngjyre ndihesh sot?

Portokalli diellore që kacafytet me grinë përditë. Herë fiton njëra, herë tjetra. Lufta ime është që peshorja të anojë nga dielli.

2. Me çfarë shpejtësie kanë ecur 10 vitet e fundit të jetës tënde?

Pesë të parat më ngadalë se ç’do të doja, pesë të fundit më shpejt se duhet. Ardhja e fëmijëve anoi peshoren drejtë diellit, por përshpejtoi ritmin e kohës dhe ndërgjegjësimin kundrejt realitetit të së fundmes.

3. Cila ka qenë zgjedhja me koston më të lartë?

Pa dyshim, angazhimi me “Diaspora për Shqipërinë e Lirë” në të mirë të Shqipërisë. Kosto shumë e lartë në raport me familjen. E vuaj shumë, çdo ditë!

4. Humbja më e vogël?

Ajo e mikut jo të sinqertë. Mungesa e sinqeritetit i zvogëlon përmasat e humbjes, por mbetet përsëri humbje.

5. Gjëja e fundit që të ka gërryer shpirtin e trazuar gjumin?

Më tmerron fakti se ndonjë ditë ndonjë veprim apo mosveprim i imi do të përkthehej në zhgënjim për familjen time. I ruhem me fanatizëm kësaj. Shenjtëria e familjes nuk negociohet!

6. Cilës ndjesi/gjendjeje do doje t'i arratiseshe?

Ndjesisë së zhgënjimit dhe gjendjes së pafuqisë.

7. Ç'dobi mund t'i sjellë njeriut mërzia?

Në praktikën Sufiste, predikohet një gjendje njehsimi dhe përjetimi ekstatik me hyjnoren që quhet “Fanā”. Kjo konsiderohet maja e ndjesisë që mund të arrijë njeriu. Thuhet se kur praktikanti del nga ky stad i lartësuar dhe ka përjetuar më të mirën e mundshme, ai tashmë vlerëson si duhet botën e prekshme dhe hijet e saj. Mërzia për mua ka efektin e kundërt. I lejon njeriut të kalojë nëpër hije të domosdoshme në mënyrë që të jetë në gjendje t’i japë vlerë dhe shijen e merituar lumturisë!

8. Cili është stimulanti më i fortë që ndez qënien tënde?

Besimi në Zot, pa pikë dyshimi! Sidomos momentet e forta të përkushtimit.

9. Çfarë bën për t'u ndjerë në formë fizike/shpirtërore?

Merrem me sport dhe ushtrime sa herë mundem. Luaj futboll. Formën shpirtërore e përmbush familja, librat, hulumtimi i vazhdueshëm i pasioneve te mia, si dhe mbi të gjitha, besimi në Zot!

10. Si reagon ndaj një pritjeje të gjatë?

Nuk reagoj. Pres deri në fund. Bëj durim.

11. Si i dallon njerëzit e mënçur?

Me fjalë kyçe, me ndjesi kyçe, me gjeste kyçe. E kam relativisht të thjeshtë konceptin për mençurinë.

12. Për çfarë të pëlqen të flasësh më shumë me miqtë?

Politikë, sport, pak filozofi, punë të mira dhe veçanërisht vende potenciale për të vizituar.

13. Profili i “mikut” të padëshiruar?

Nëntëdhjetë e nëntësh. Njeri i 1001 allishverisheve. Bosht moral i paqartë ose i munguar. Jam i huaj ndaj tyre dhe nuk do ndjehesha mirë me një “mik” të tillë.

14. Cila është formula e njeriut të mirë?

Njeriu i thjeshtë. I ndershëm. Ai që nuk prek kurrë atë që nuk i takon. Ai që ndihmon të pamundurin dhe dhuron pa pritur për të marrë diçka në këmbim.

15. Përkufizimi i budallallëkut?

Gjithollogu.

16. Çfarë nuk do t'ia uroje as "hasmit"?

Terrorin komunist.

17. Një rast tipik kur të vjen për të sharë?

“Po ikën këta, kush do vijë?”. Megjithatë nuk shaj, përmbahem.

18. Urimi që merr e jep më shpesh?

Jap - “Zoti ju dhëntë shëndet dhe qofshi gjithmonë të nderuar”. Në sytë e mi nuk ka lartësim më të madh se ky në këtë dynja. Marr - “Mos u dorëzo”. Më jep forcë.

19. Cili është vendi që të qetëson sapo e sjell ndërmënd?

Deti, klima e ngrohtë.

20. Po libri që ke për zemër?

Gjuetari i balonave - Khaled Hosseini. Përmbledh emocione të jashtëzakonshme dhe ekspozon qartë të keqen e diktatit, qoftë ky komunist apo teokratik. Nuk harroj kurrë pasazhin: “mullahët mundohen të na sundojnë shpirtin kurse komunistët thonë se nuk e kemi një të tillë”.

21. Kënga që të vjen më shpesh në mendje?

Përgjigja e kësaj pyetjeje flladon me përqasjen emocionale në të cilëm ndodhem. Për momentin fokusin e kam tek vendi kështu që qasja është më patriotike. Më dhemb shpopullimi i vendit dhe fryrja e radhëve të Diasporës. Do të veçoja “Këtu kam folenë” e Ilir Shaqirit. Në momente të tjera ndjesoj fort duke dëgjuar këngë më ëmbëlsore apo lirike.

22. Udhëtimi që nuk është ndërmarrë ende?

Vendet e shenjta në Lindjen e Mesme. Afrika.

23. Pema që të kënaq syrin?

Bliri, me kënaq syrin dhe nuhatjen.

24. Nata perfekte e dimrit kanadez?

Nata kur bora bie lehtë, pa erë, dhe shkriftësia e saj bën zhurmën karakteristike në këpucë. Kur shkas në pistën e patinazhit me vajzën.

25. Produkti që nuk do të doje të mungonte kurrë në dyqan?

Jam bazik si njeri. Kënaqem me pak. Hidet dhe gështenjat do t'i doja në çdo stinë.

26. Pjata/ushqimi që nuk do refuzoje dot as me stomakun plot?

Një pirun makarona, një kafshatë picë ose një romb bakllava.

27. Zakoni që do doje mos ta kishe?

Shpërqëndrimi, ndonjëherë.

28. Aftësia që do doje të kishe?

Aftësia për të gjetur rrugët e duhura që të bëj diferencë sado të vogël për vendin tim. Po mundohem fort, çdo ditë.

29. Parashikimi për të ardhmen e profesionit që ushtron?

Solid, gjithmonë i nevojshëm.

30. Cila është arritja jote më e madhe në aspektin profesional?

Përpjekjet e mia në drejtim të luftës kundër korrupsionit dhe mitmarrjes në systemin e patentave nga ana profesionale. Por krenarinë më të madhe e kam ndjerë kur kam ndihmuar bashkëatdhetarët tanë të lundrojnë sistemin si duhet apo edhe të punësohen kur kanë patur nevojë.

31. Si ndihesh tani në fund të pyetësorit tim?

Ndjej çiltërsi. Pyetësor shumë interesant dhe cilësor që eksploron mirë karakterin e njeriut. Të jam falenderues Jeta!

© Flasshqip.ca - 11 Prill 2021