Shtiremi të majtë a të djathtë për hir të çfarë?

Nga: Çapajev Gjokutaj

Ramë shumë shpejt në një mendje. Në Shqipëri nuk ka as të majtë, as të djathtë. Ka vetëm dy klane politike që alternojnë njëri-tjetrin në pushtet. Dhe per të arritur t'i gëzojnë të mirat e qeverisjes, na kanë hedhur trutë e gomarit.

Pandehim se jemi të djathtë a të majtë, se militojmë për alternativa të ndryshme zhvillimi. Në fakt gjithçka bëhet për pronat e privilegjet e parisë, shumë-shumë për interesa klanesh.

Këtu doli një pyetje që e diskutuam gjatë e s'i dhamë dot dum. Si shjegohet që hyjmë kaq seriozisht në rol? Jemi naivë dhe besojmë vërtet, apo shtiremi ngaqë kështu na e do interesi?

Mbase shtiremi. Hiqemi të djathtë a të majtë që të bëhemi pjesë e klanit e të përfitojmë diçka. Secili sipas takatit. Ca tendera e konçensione, domethënë llokma Shqipërie, të tjerë thërrime, një vend pune në administratë për shembull.

Mbase i mbushim mendjen vetes se qënkemi të majtë a të djathtë ngaqë bëjmë jetë shpirtërore të varfër. Njeriut s'i pëlqen ta shohë veten bosh e mediokër, ndaj vetësugjestionohet se lufton për gjëra të mëdha, se ia kanë nevojën etj… etj.

Mbase kemi një keqkuptim masiv. Konvertojmë mekanikisht të persekutuarit në të djathtë, kurse përkrahësit e diktaturës në të majtë.

Mbase ndarja në grupe që luftojnë njëri-tjetrin është zakon i shoqërive të varfëra. Të mirat materiale e shpirtërore nuk dalin për të gjithë. Kjo na ka shtyrë historikisht të stërtheksojmë ndarjet në sojlinj dhe harbutë, në muslimanë e kaurë, në partizanë e ballistë, në të majtë e të djathtë.

Këto grupe gjithnjë demonizojnë njëri-tjetrin. Jo se tjetri është vërtetë i lig, por se duhet përjashtuar nga ndarja e të mirave, që i kemi me pakicë.

(Nga cikli 'Kafe për llafe' )