Qyteti i vdekur - Nga Bardhyl Londo

Qyteti vdiq.

Sheshi qendror si nje tru i stërmadh

ngurosur nga infarkti.

Rrugët kryesore -

arterie të ngrira,

në to nuk gjallon më gjaku.

Skelete restorantesh,

kufoma baresh,

shetitore të ngrira si me urdhër magjistarësh.

Netë të nxira,

pa dashuri, pa flirte,

ditë uniforme -

koka të qethura ushtarësh.

Kambanat e dy katedraleve heshtin memece,

xhamitë pa zërin e hoxhës

majat shtizë zgjatin drejt qiellit kot së koti.

Në këtë qytet

ka vdekur dhe Zoti.

Mars, 2020